რეგიონში მშვიდობისა და სტაბილურობის უზრუნველყოფის მიზნით, აშშ ყველა მხარეს მოუწოდებს გააგრძელონ მუშაობა ჟენევის ფორმატში დისკუსიებისა და ინციდენტების პრევენციის და მათზე რეაგირების ჯგუფებში. ამის შესახებ აშშ-ს სახელმწიფო დეპარტამენტში განუცხადეს ქართველ ჟურნალისტებს, რომლებსაც აინტერესებდათ იქონიებს თუ არა გავლენას ჟენევის მოლაპარაკების პროცესზე აფხაზეთის მარიონეტული რეჟიმის მიერ ევროკავშირის სადამკვირვებლო მისიის ხელმძღვანელის, გენერალ ანდჟი ტიშკევიჩის "პერსონა ნონ-გრატად" გამოცხადება.
სახელმწიფო დეპარტამენტში მწუხარება გამოხატეს იმ ფაქტთან დაკავშირებით, რომ ოკუპირებულ ტერიტორიებზე ასეთი მნიშვნელოვანი მისია თავის ფუნქციებს ვერ ასრულებს. ამასთან, აშშ-მ კიდევ ერთხელ დააფიქსირა საქართველოს ტერიტორიული მთლიანობის მხარდაჭერა.
ოკუპირებული აფხაზეთის მარიონეტული რეჟიმის მიერ ევროკავშირის სადამკვირვებლო მისიის ხელმძღვანელის პერსონა ნონ-გრატად გამოცხადებას საქართველოში აშშ-ს ელჩი ჯონ ბასიც გამოეხმაურა.
მან კიდევ ერთხელ გამოხატა მხარდაჭერა ევროკავშირის სადამკვირვებლო მისიის საქმიანობასთან დაკავშირებით და აღნიშნა, რომ ევროპელი დამკვირვებლები ხელს უწყობენ ოკუპირებულ ტერიტორიებზე არსებულ ვითარებაზე დაზუსტებული ინფორმაციების მოპოვებაში.
|