კიშინიოვის მერიამ გამოიტანა დადგენილება გლოვის ნიშნად ქალაქში 16 მაისს სახელმწიფო დროშების დაშვების შესახებ. მერის აპარატის უფროსი ლილიან კარპი იტყობინება, რომ ეს აქცია დაკავშირებულია ბუქარესტის სამშვიდობო ზავის მე–200 წლისთავთან. მერიის წარმომადგენელმა ხაზი გაუსვა იმას, რომ აღნიშნული დადგენილებით მოლდოვეთის დედაქალაქის მთავრობას სურს მოსახლეობისათვის რუსეთ–თურქეთის პაქტის არახელსაყრელი შედეგების დემონსტრირება.

ამ გადაწყვეტილებით კიშინიოვის მერიამ მხარი დაუჭირა „გაერთიანების საბჭოს“ ინიციატივას – ორგანიზაციას, რომელიც გამოდის მოლდოვისა და რუმინეთის გაერთიანების ინიციატივით, და რომლის წევრებმაც (ორი ქვეყნის პოლიტიკოსებმა, კულტურის მოღვაწეებმა და მეწარმეებმა) მოლდოვის ხელისუფლებას ა.წ. მარტის ბოლოს მოუწოდეს 16 მაისი, რუსეთის იმპერიის მიერ 1812 წელს ბესარაბიის ოკუპაციის ნიშნად, გამოცხადებულიყო ეროვნული გლოვის დღედ.

აღნიშნული ზავი ხელმოწერილ იქნა რუსეთ–თურქეთის ომის დასრულების შემდეგ 1812 წლის 16 მაისს. მისი მიხედვით ბესარაბია, რომლის უმეტესი ნაწილი შეადგენს თანამედროვე მოლდოვის ტერიტორიას, შევიდა რუსეთის იმპერიის შემადგენლობაში, ხოლო მე–XX საუკუნის დასაწყისში ბესარაბია შეუერთდა რუმინეთს. 1940 წელს, სსრკ–სა და გერმანიის შორის დადებული თავდაუსხმელობისა და აღმოსავლეთ ევროპაში გავლენის სფეროების გადანაწილების პაქტის მიხედვით, საბჭოთა ხელისუფლებამ დაიბრუნა რეგიონზე კონტროლი და მის ტერიტორიაზე შექმნილი იქნა მოლდოვეთის საბჭოთა სოციალისტური რესპუბლიკა.