სოჭში ტერორისტული აქტების აღკვეთის ფარგლებში აფხაზეთში დაკავებული იქნა ცნობილი საერაშორისო ტერორისტის, ’’ აფხაზეთის გმირის’’ შამილ ბასაევის ცოლის ძმა. საუბარია გუდაუთაში დაპატიმრებულ რუსტან გიცბაზე, რომელიც, როგორც ’’Апсныпресс’’– ი იუწყება არის იმარატ კავკაზას – აფხაზეთის ჯამაათის ხელმძღვანელი.

როგორც იუწყებიან, სწორედ დაკავებულის საცხოვრებელ სახლში გუდაუთის რაიონის სოფელ დურიფშში ა.წ. 4–5 მაისს აღმოჩენილი იქნა სამალევები დიდი ოდენობის იარაღით, საბრძოლო მასალებითა და ასაფეთქებელი ნივთიერებებით.
უნდა აღინიშნოს, რომ რუსტან გიცბა არის 2007 წელს გუდაუთაში მოკლული აფხაზი იმამის ჰამზათ (როკი) გიცბას ძმა. ჰამზათ გიცბა შამილის დაჯგუფებაში შედიოდა, რომელიც 1992–1993 წლებში აფხაზეთის ტერიტორიაზე საქართველოს წინააღმდეგ იბრძოდა. ხოლო 1996 წელს ჰამზათ გიცბა თურქეთის პორტ ტრაბზონში ’’შამილის შვილიშვილის’’ დაჯგუფების შემადგენლობაში ბორანის „Авразия’’ –ს გატაცებაში მონაწილეობდა.

შეგახსენებთ, რომ ბორანზე 200 მეტი ადამიანი იმყოფებოდა. ტერორისტები რუსი–მძევლების დახვრეტითა და გემის აფეთქებით იმუქრებოდნენ, ვიდრე არ შეწყდებოდა სოფელ პერვომაისკოეს შტურმი, სადაც ყიზლიარში ჩატარებული ტერორისტული აქტის შემდეგ სალმან რადუევის ალყაშემორტყმული დაჯგუფება იმყოფებოდა.

თურქული ხელისუფლებისათვის ჩაბარების შემდეგ ჰამზათ გიცბა თავის ამხანაგებთან ერთად ციხეში აღმოჩნდა, საიდანაც 1997 წელს ჩეჩენ ზუბაროევთან ერთად გაიქცა. მანამდე ერთი თვით ადრე, სექტემბერში ციხიდან გაიქცა „შამილის შვილიშვილების’’ თავკაცი – აფხაზი აბას მუჰამედ თოქჩანი (თუქ–იპა) და დაჯგუფების სხვა წევრები.

ჰამზათ გიცბასა და ამჟამად დაკავებულის რუსტან გიცბას ბიძაშვილი – ინდირა ჯენია, შამილ ბასაევის ერთერთი ცოლი იყო.