ოკუპირებული აფხაზეთის მარიონეტული რეჟიმის ე.წ. "უშიშროების საბჭო" ამ ეტაპისთვის არ ადასტურებს რუსეთის ანტიტერორისტული კომიტეტის მიერ გავრცელებულ ინფორმაციას იმის თაობაზე, რომ აფხაზეთში რამდენიმე სამარხში აღმოჩენილი იარაღი სოჭის ოლიმპიადის ჩაშლისათვის იყო გამიზნული - ამის შესახებ ინფორმაციას რუსული გამოცემა "კომერსანტი" ავრცელებს. "უშიშროების საბჭოში" აცხადებენ, რომ ამგვარი ვერსია მართალია განიხილება, თუმცა ამის მტკიცება ჯერ არ შეიძლება. ამასთან აღიარებენ, რომ აღმოჩენილი იარაღის გამოყენება აფხაზეთში ძალაუფლებისათვის ბრძოლისათვის იგეგმებოდა.

როგორც "კომერსანტს" განუცხადეს, იარაღის სამარხები აღმოჩენილი იქნენ ოკუპირებული აფხაზეთის მარიონეტული რეჟიმის ხელმძღვანელზე - ალექსანდრე ანქვაბზე თავდასხმის საქმის გამოძიებისას.

"თავიდანვე გახდა ცხადი, რომ თავდამსხმელები იყვნენ არა მარტო კარგად შეიარაღებული, არამედ სათანადო მომზადებაც ჰქონდათ გავლილი - ისინი საკმაოდ შეთანხმებულად მოქმედებდნენ. თავდასხმისას პრაქტიკულად ნამდვილი ბრძოლა გაიმართა ყუმბართმტყორცნების, ავტომატური ცეცხლსასროლი და სხვა სახის შეიარაღების გამოყენებით. ეს პირველი შემთხვევაა, როდესაც რესპუბლიკაში არალეგალური იარაღის ასეთი დიდი პარტია აღმოაჩინეს", - განუცხადა "კომერსანტს" წყარომ ე.წ. "უშიშროების საბჭოში.

ამასთან შეგახსენებთ, რომ რუსეთის ეროვნული ანტიტერორისტული კომიტეტის მიერ გავრცელებული ინფორმაციის თანახმად, აფხაზეთში აღმოჩენილია სამარხები იარაღის დიდი რაოდენობით, რომელთა გამოყენებას ტერორისტები სოჭის ოლიმპიადის წინააღმდეგ გეგმავდნენ.